ബാലിസ്റ്റിക്, ക്രൂയിസ് മിസൈലുകൾ: ആധുനിക പ്രതിരോധരംഗത്തെ പോരാളികൾ.

കാലത്തിന്റെ തിരശ്ശീലകൾക്കപ്പുറം, പുരാതന ഇതിഹാസഭൂമിയിൽ, ദേവി ദേവന്മാരുടെ അനുഗ്രഹത്താൽ ജ്വലിച്ച ദിവ്യാസ്ത്രങ്ങളുണ്ടായിരുന്നു. അത് കേവലം അമ്പുകളായിരുന്നില്ല, മറിച്ച് പ്രകൃതി ശക്തികളെ സംയോജിപ്പിച്ച് തങ്ങളുടെ ഇച്ഛാശക്തിക്കനുസരിച്ച് ചലിപ്പിച്ച ആകാശത്തിലൂടെ പാഞ്ഞടുക്കുന്ന ആയുധങ്ങളായിരുന്നു. എന്നാൽ ഇന്നത് ലോഹച്ചിറകുകളേന്തി, തീജ്വാലങ്ങൾ തുപ്പി കൃത്യതയുടേയും വേഗതതയുടെയും പുതിയ അധ്യായങ്ങൾ തുറന്ന് ആകാശത്തിലൂടെ കുതിക്കുന്ന മിസൈലുകളാണ്. ആധുനിക യുദ്ധതന്ത്രത്തിൽ മനുഷ്യന്റെ ഭാവനയും, സാങ്കേതിക മികവും ഒരുമിച്ച് ചേർത്ത് രൂപപ്പെടുത്തിയ ഒരു നിശബ്ദ്ധപോരാളികൾ. ലക്ഷ്യസ്ഥാനത്തേക്ക് ഒരു പ്രഹരശേഷിയുള്ള പേലോഡ് കൃത്യതയോടെ എത്തിക്കാൻ രൂപകൽപ്പന ചെയ്ത, സ്വയം നിയന്ത്രിത ആയുധങ്ങളാണ് അവ. ഇരുപത്തിയൊന്നാം നൂറ്റാണ്ടിലെ സൈനിക ശക്തിയുടെ സങ്കീർണ്ണമായ ഘടനയിൽ ബാലിസ്റ്റിക് മിസൈലുകൾ, ക്രൂയിസ് മിസൈലുകൾ, റോക്കറ്റുകൾ, പീരങ്കികൾ തുടങ്ങിയവയെല്ലാം ഉൾപ്പെടുന്നു. മിസൈലുകളേ അവയുടെ പ്രവർത്തനരീതി, പറക്കൽ പാത, വേഗത, ദൂരപരിധി എന്നിവയുടെ അടിസ്ഥാനത്തിൽ വിവിധ വിഭാഗങ്ങളായി തരംതിരിക്കപ്പെട്ടിട്ടുണ്ട്. അതിൽ പ്രധാനികളായ ബാലിസ്റ്റിക് മിസൈലുകളെയും ക്രൂയിസ് മിസൈലുകളെയും പറ്റി നാം ഈ അടുത്തിടെയായി ഒരുപാട് കേൾക്കുന്നുണ്ട് എന്നാൽ, ഈ രണ്ട് തരം മിസൈലുകളും തമ്മിൽ എന്താണ് വ്യത്യാസം? എന്താണ് ഇവയുടെ പ്രവർത്തനരീതി, സവിശേഷതകൾ, ഉപയോഗങ്ങൾ? ബാലിസ്റ്റിക്, ക്രൂസ് മിസൈലുകളെക്കുറിച്ചുള്ള സമഗ്രമായ ഒരു വിശദീകരണവും അവ തമ്മിലുള്ള വ്യത്യാസങ്ങളുമാണ് ഈ ലേഖനത്തിലൂടെ വിശകലനം ചെയ്യുന്നത്.

സാധാരണയായി മിസൈൽ സംവിധാനങ്ങൾക്ക് പ്രധാനമായും അഞ്ച് ഘടകങ്ങളാണുള്ളത്: ലക്ഷ്യനിർണ്ണയം (targeting), മാർഗനിർദ്ദേശ സംവിധാനം (Guidance System), ഫ്ലൈറ്റ് സിസ്റ്റം, എഞ്ചിൻ, വാർഹെഡ് എന്നിവയാണവ. ഈ ഘടകങ്ങളെല്ലാം ഒരുമിച്ച് പ്രവർത്തിച്ചാണ് മിസൈലിനെ അതിന്റെ ലക്ഷ്യത്തിലേക്ക് നയിക്കുന്നത്. ഈ സംവിധാനങ്ങളെക്കുറിച്ചുള്ള അടിസ്ഥാനപരമായ അറിവ്, അവയുടെ തന്ത്രപരമായ പ്രാധാന്യം മനസ്സിലാക്കാൻ അത്യാവശ്യം തന്നെയാണ്.

ബാലിസ്റ്റിക് മിസൈലുകൾ (ballistic Missiles)

India's Agni-V: ICBM (Intercontinental Ballistic Missile)

ആദ്യം തന്നെ ഈ പേരിനുള്ളിലെ ബാലിസ്റ്റിക് എന്നതുകൊണ്ട് എന്താണ് ഉദ്ദേശിക്കുന്നത് എന്നത് വേഗത്തിൽ നോക്കാം. ഒരു വസ്തു, ഉദാഹരണത്തിന് ഒരു മിസൈൽ, വെടിയുണ്ട, അല്ലെങ്കിൽ എറിഞ്ഞ ഒരു കല്ല് എന്നിവ വായുവിലൂടെയോ ബഹിരാകാശത്തിലൂടെയോ നീങ്ങുമ്പോൾ ഗുരുത്വാകർഷണബലത്തിൻ്റെയും വായുവിൻ്റെ പ്രതിരോധത്തിൻ്റെയും സ്വാധീനത്തിൽ അത് ഒരു വളഞ്ഞ പാതയിലൂടെ സഞ്ചരിക്കുകയും താഴേക്ക് പതിക്കുകയും ചെയ്യും. ഈ ഒരു പാതയാണ് ട്രജക്ടറി (Trajectory). ഈ ഒരു സഞ്ചാരപാതയുടെ സ്വഭാവം, വേഗത, ദൂരം എന്നിവയെ കുറിച്ച് പഠിക്കുന്ന ശാസ്ത്രശാഖയാണ് 'ബാലിസ്റ്റിക്സ് ' എന്നത്. ഇപ്പോൾ തന്നെ ബാലിസ്റ്റിക് മിസൈലുകൾ എങ്ങനെയാണ് പ്രവർത്തിക്കുന്നത് എന്നത് ഒരു ഊഹം ലഭിച്ചു കാണുമെല്ലോ. 

ഈ മിസൈലുകൾക്ക് അവയുടെ പേര് ലഭിച്ചത് തന്നെ ഈയൊരു ആശയത്തിൽ നിന്ന് തന്നെയാണ്. മിസൈലുകളുടെ കാര്യത്തിൽ അവ റോക്കറ്റ് എഞ്ചിനുകളുടെ സഹായത്തോടെയാണ് ഒരു നിശ്ചിത ഉയരത്തിലേക്ക് കുതിച്ചുയരുന്നത്. ബൂസ്റ്റ് ഘട്ടത്തിൽ മാത്രമാണ് എഞ്ചിനുകൾ പ്രവർത്തിക്കുന്നത്. ഇന്ധനം തീർന്നുകഴിഞ്ഞാൽ, മിസൈൽ ഒരു ആർക്ക് രൂപത്തിലുള്ള പാതയിലൂടെ (Trajectory), യാതൊരു നിയന്ത്രണവുമില്ലാതെ, ഗുരുത്വാകർഷണബലത്തിന് വിധേയമായി ലക്ഷ്യസ്ഥാനത്തേക്ക് പതിക്കുന്നു. ഇതിനർത്ഥം, മിസൈൽ വിക്ഷേപിച്ചുകഴിഞ്ഞാൽ അതിന്റെ പാത മുൻകൂട്ടി നിശ്ചയിക്കപ്പെട്ടതും സ്ഥിരവുമാണ്. ഈ സ്വഭാവം കാരണമാണ് ഇത്തരം മിസൈലുകളെ "ബാലിസ്റ്റിക് മിസൈലുകൾ" എന്ന് വിളിക്കുന്നത് തന്നെ. പറക്കലിനിടെ ലക്ഷ്യം മാറ്റാനോ അല്ലെങ്കിൽ ദിശ ക്രമീകരിക്കാനോ ഇതിന് സാധിക്കില്ല. ഈ സവിശേഷത അവയെ പ്രധാനമായും സ്ഥിരമായ ലക്ഷ്യങ്ങൾ (ഉദാ: നഗരങ്ങൾ, സൈനിക താവളങ്ങൾ എന്നിവ) തകർക്കാൻ അനുയോജ്യമാക്കുന്നു. എന്നിരുന്നാലും, ലക്ഷ്യത്തിന്റെ ചലനം അല്ലെങ്കിൽ അവസാന നിമിഷത്തിലെ മാറ്റങ്ങൾ എന്നിവയോട് പ്രതികരിക്കാനുള്ള കഴിവില്ലായ്മ ഒരു പ്രധാന പരിമിതിതന്നെയാണ്. ഇവയ്ക്ക് സാധാരണയായി വാർഹെഡുകളോ ആണവായുധങ്ങളോ വരെ വഹിക്കാൻ കഴിയും.

പ്രവർത്തനരീതിയും പറക്കലിന്റെ ഘട്ടങ്ങളും:

ബാലിസ്റ്റിക് മിസൈലുകൾ പ്രധാനമായും മൂന്ന് ഘട്ടങ്ങളിലൂടെയാണ് പ്രവർത്തിക്കുന്നത്, ഓരോ ഘട്ടങ്ങൾക്കും അതിന്റേതായ പ്രാധാന്യങ്ങൾ ഉണ്ട്. വ്യക്തമായി തന്നെ നോക്കാം.

Boost Phase:

മിസൈലിന്റെ റോക്കറ്റ് എഞ്ചിനുകൾ പ്രവർത്തിക്കുന്ന ഘട്ടമാണിത്. വിക്ഷേപണം മുതൽ റോക്കറ്റ് എഞ്ചിൻ പ്രവർത്തിക്കുന്നത് നിർത്തുന്നത് വരെ ഈ ഘട്ടം നീണ്ടുനിൽക്കുന്നു. മിസൈലിന്റെ തരം അനുസരിച്ച് ഇത് മൂന്ന് മുതൽ അഞ്ച് മിനിറ്റ് വരെ നീണ്ടുനിൽക്കാം. ഭൂരിഭാഗവും അന്തരീക്ഷത്തിലാണ്  ഈ ഘട്ടം നടക്കുന്നത്. മിസൈൽ പരമാവധി ത്വരണം കൈവരിക്കുകയും, അത് അതിവേഗം ഉയരങ്ങളിലേക്ക് കുതിക്കുകയും ചെയ്യുന്നത് ഈ ഘട്ടത്തിൽ തന്നെയാണ്.

Midcourse Phase:

ഇതാണ് രണ്ടാം ഘട്ടം. റോക്കറ്റ് എഞ്ചിനുകൾ പ്രവർത്തനരഹിതമാക്കിയ ശേഷമാണ് ഈ ഘട്ടം ആരംഭിക്കുന്നത്. മിസൈൽ അതിന്റെ പാതയിലെ ഏറ്റവും ഉയർന്ന പോയിന്റിലേക്ക്  ഉയർന്ന ശേഷം, തുടർന്ന് ഭൂമിയിലേക്ക് ഇറങ്ങാൻ തുടങ്ങുന്നു. ഇത് മിസൈലിന്റെ പറക്കലിന്റെ ഏറ്റവും ദൈർഘ്യമേറിയ ഘട്ടമാണ്. ഇന്റർകോണ്ടിനെന്റൽ ബാലിസ്റ്റിക് മിസൈലുകൾക്ക് (ICBMs) ഇത് ഏകദേശം 20 മിനിറ്റ് വരെ നീണ്ടുനിൽക്കുമത്രേ. ഈ ഘട്ടത്തിൽ ICBM-കൾക്ക് മണിക്കൂറിൽ ഏകദേശം 24,000 കിലോമീറ്റർ വരെ വേഗതയിൽ സഞ്ചരിക്കാൻ കഴിയും. അന്തരീക്ഷത്തിന് പുറത്ത്, ബഹിരാകാശത്തുകൂടിയാണ് ഈ ഘട്ടത്തിൽ മിസൈൽ സഞ്ചരിക്കുന്നത്.

Terminal Phase:

മൂന്നാം ഘട്ടം. മിസൈലിൽ നിന്ന് വേർപ്പെടുന്ന വാർഹെഡ് ഭൂമിയുടെ അന്തരീക്ഷത്തിലേക്ക് പ്രവേശിക്കുന്നതോടെ ഈ ഘട്ടം ആരംഭിക്കുകയും ലക്ഷ്യസ്ഥാനത്ത് പതിക്കുകയോ സ്ഫോടനം സംഭവിക്കുകയോ ചെയ്യുന്നതോടെ അവസാനിക്കുകയും ചെയ്യും. ഒരു മിനിറ്റിൽ താഴെ മാത്രം നീണ്ടുനിൽക്കുന്ന ഈ ഘട്ടത്തിൽ വാർഹെഡുകൾക്ക് മണിക്കൂറിൽ 3,200 കിലോമീറ്ററിൽ കൂടുതൽ വേഗതയിൽ സഞ്ചരിക്കാൻ കഴിയും. മാത്രമല്ല ഈ ഘട്ടത്തിലെ അതിവേഗത, മിസൈൽ പ്രതിരോധ സംവിധാനങ്ങൾക്ക് പ്രതികരിക്കാൻ വളരെ കുറഞ്ഞ സമയം മാത്രമേ നൽകുന്നുള്ളൂ.

ബാലിസ്റ്റിക് മിസൈലുകൾക്ക് റോക്കറ്റ് എഞ്ചിനുകളാണ് ശക്തി നൽകുന്നത്എന്ന് പറഞ്ഞുകഴിഞ്ഞിരുന്നെല്ലോ. ഈ എഞ്ചിനുകൾക്ക് ഖര ഇന്ധനങ്ങളോ (solid-propellants) അല്ലെങ്കിൽ ദ്രാവക ഇന്ധനങ്ങളോ (liquid-propellants) ഉപയോഗിക്കാം. ഖര ഇന്ധനങ്ങൾ സാധാരണയായി പരിപാലിക്കാൻ എളുപ്പവും വേഗത്തിൽ വിക്ഷേപിക്കാൻ കഴിയുന്നവയുമാണ്, എന്നാൽ ദ്രാവക ഇന്ധനങ്ങൾ വലിയ മിസൈലുകൾക്ക് കൂടുതൽ ശക്തി നൽകുന്നു. മിസൈലിന്റെ ദൂരപരിധിയും വഹിക്കാൻ കഴിയുന്ന പേലോഡിന്റെ ഭാരവും നിർണ്ണയിക്കുന്നതിൽ പ്രൊപ്പൽഷൻ സംവിധാനം നിർണായക പങ്കുണ്ടത്രേ. 

ആധുനിക ബാലിസ്റ്റിക് മിസൈലുകളുടെ വാർഹെഡുകളിൽ "മനുവറിംഗ് റീ-എൻട്രി വെഹിക്കിൾ" (MaRV) പോലുള്ള സാങ്കേതികവിദ്യകൾ ഉൾപ്പെടുത്തി, ടെർമിനൽ ഘട്ടത്തിൽ ചെറിയതോതിൽ ദിശ മാറ്റാനും കൃത്യത വർദ്ധിപ്പിക്കാനും വേണ്ടിയുള്ള പരീക്ഷണങ്ങളും ശ്രമങ്ങളുമൊക്കെ നടക്കുന്നുണ്ട്. ഭാവിയിൽ ഇത് ബാലിസ്റ്റിക് മിസൈലുകളുടെ പ്രഹരശേഷി വർധിപ്പിക്കുക തന്നെ ചെയ്യും.

ബാലിസ്റ്റിക് മിസൈലുകളെ അവയുടെ പരമാവധി ദൂരപരിധിയുടെ അടിസ്ഥാനത്തിൽ പ്രധാനമായും നാലോ അഞ്ചോ വിഭാഗങ്ങളായി തരംതിരിച്ചിട്ടുണ്ട്. ഇതിൽ പൊതുവായത് താഴെ പറയുന്നവയാണ്.

• Short-Range Ballistic Missiles (SRBMs): സാധാരണയായി 1,000 കിലോമീറ്ററിൽ താഴെയാണ് ഇവയുടെ ദൂരപരിധി. പ്രധാനമായും ചെറിയ ദൂരത്തിലുള്ള ശത്രുസൈനിക ക്യാമ്പുകൾ, ആർമർ, കമാൻഡ് സെന്ററുകൾ, എയർബേസ് തുടങ്ങിയവ ആക്രമിക്കാനാണ് ഇവ ഉപയോഗിക്കുന്നത്. യുദ്ധത്തിൽ തൽക്ഷണമായി ഉപയോഗിക്കാവുന്ന ആയുധങ്ങളയാതിനാൽ "ടാക്റ്റിക്കൽ" മിസൈലുകൾ എന്നും ഇവയ്ക്ക് പേരുണ്ട്. ഉദാഹരണം: ഇന്ത്യയുടെ പ്രഥവി (Prithvi)-II, ചൈനയുടെ DF-11
• Medium-Range Ballistic Missiles (SRBMs): 1000 മുതൽ 3000 കിലോമീറ്റർ വരെ ദൂരപരിധി ഇവയെ "തിയേറ്റർ" ബാലിസ്റ്റിക് മിസൈലുകൾ എന്നും വിളിക്കുന്നു. പ്രധാനമായും ഒരു രാജ്യത്തിന്റെ സമീപ പ്രദേശങ്ങളിലുള്ളതോ അല്ലെങ്കിൽ യുദ്ധക്കളത്തിന്റെ ഒരു പ്രത്യേക ഭാഗമായോ ഉള്ള വലിയ ലക്ഷ്യങ്ങളെ തകർക്കാൻ ഇവ ഉപയോഗിക്കുന്നു. ഉദാഹരണം: ഇന്ത്യയുടെ അഗ്നി-II (Agni-II), പാകിസ്താന്റെ ഷഹീൻ-II (Shaheen-II)
• Intermediate Range Ballistic Missiles (IRBMs): 3000 മുതൽ 5500 കിലോമീറ്റർ വരെ ദൂരപരിധി. ഒരു ഭൂഖണ്ഡത്തിനുള്ളിൽ തന്നെയുള്ള വലിയ ദൂരങ്ങളിലുള്ള ലക്ഷ്യങ്ങളെ, അതായത് അയൽരാജ്യങ്ങളെയോ അല്പം ദൂരെയുള്ള മറ്റു രാജ്യങ്ങളെയോ ലക്ഷ്യമിടാൻ ഇവയ്ക്ക് സാധിക്കും. ഉദാഹരണം: ഇന്ത്യയുടെ അഗ്നി-III, റഷ്യയുടെ RSD-10 Pioneer
• Intercontinental Ballistic Missiles (ICBMs): 5500 കിലോമീറ്ററിൽ കൂടുതൽ ദൂരപരിധി. പേര് സൂചിപ്പിക്കുംപോലെ ഇവയ്ക്ക് ഭൂഖണ്ഡങ്ങൾ താണ്ടി ലക്ഷ്യത്തിലെത്താൻ കഴിയും. ഓരോ രാജ്യങ്ങളുടേയും തന്ത്രപരമായ പ്രതിരോധത്തിന്റെ നട്ടെല്ല്തന്നെയാണ് ഇവ. ഉദാഹരണം: ഇന്ത്യയുടെ അഗ്നി-V, അമേരിക്കയുടെ മിനിറ്റ്‌മാൻ III (Minuteman-III)

ക്രൂയിസ് മിസൈലുകൾ (Cruise Missiles)

India's Brahmasthra; 'Brahmos'

റോക്കറ്റുകളെപ്പോലെ കുതിച്ചുയർന്ന്, ഒരു വലിയ വളഞ്ഞ പാതയിലൂടെ ബഹിരാകാശത്തേക്ക് പോയി താഴെ വരുന്ന ബാലിസ്റ്റിക് സൈലുകളെക്കുറിച്ച് നമ്മൾ ചർച്ചചെയ്തു. എന്നാൽ ക്രൂയിസ് മിസൈലുകൾ അങ്ങനെയല്ല. ഇവ ഒരു ചെറിയ വിമാനത്തെപ്പോലെയാണ്. അതിനുള്ളിൽ ഒരു ജെറ്റ് എഞ്ചിൻ ഉണ്ടാകും. ആരും ഓടിക്കാനില്ലാത്ത, സ്വയം ലക്ഷ്യത്തിലേക്ക് പറന്നുപോകുന്ന ഒരു ചെറിയ വിമാനം എന്ന് വേണമെങ്കിൽ പറയാം. ഇവയെ കരയിൽ നിന്നോ, ആകാശത്തു നിന്നോ, കടലിൽ നിന്നോ വിക്ഷേപിക്കാൻ കഴിയും. ഇനിയും ഇവയുടെ പ്രവർത്തന രീതിയും സവിശേഷതയുമൊക്കെ, വ്യക്തമായി നോക്കാം

പറക്കുന്ന രീതി:

ബാലിസ്റ്റിക് മിസൈലുകൾ ആകാശത്തേക്ക് കുതിച്ചുയർന്ന്, അന്തരീക്ഷത്തിന് മുകളിലൂടെ പോയി താഴേക്ക് വരുന്നതെങ്കിൽ, ക്രൂയിസ് മിസൈലുകളുടെ സഞ്ചാരം അങ്ങനെയേ അല്ല മറിച്ച് ഭൂമിയോട് ചേർന്ന്, താഴ്ന്ന ഉയരത്തിൽ, ഒരു വിമാനം പറക്കുന്നതുപോലെയാണ് സഞ്ചരിക്കുന്നത്. മലകളും കുന്നുകളും ഒക്കെ വന്നാൽ അതിനെയെല്ലാം മറികടന്ന് അല്ലെങ്കിൽ അതിനിടയിലൂടെയൊക്കെ പറന്ന് ലക്ഷ്യത്തിലേക്ക് എത്തിച്ചേരും എന്നതാണ് ആശാന്റെ കഴിവ്. ഇങ്ങനെ താഴ്ന്ന് പറക്കുന്നത് കൊണ്ടെന്താ റഡാറുകൾക്ക് ഇവയെ പെട്ടെന്ന് കണ്ടെത്താനും കഴിയില്ല. അതിനാൽ ശത്രുക്കൾ അറിയാതെ ലക്ഷ്യത്തിൽ എത്താനും ഇത് സഹായിക്കും.

Propulsion:

മിക്ക ക്രൂയിസ് മിസൈലുകളും സബ്സോണിക് വേഗതയിൽ പറക്കുന്നവയാണ്. അതായത് ശബ്ദത്തിന്റെ വേഗതയേക്കാൾ കുറഞ്ഞ വേഗതയിൽ. ഇതിനായി അവ ടർബോഫാൻ (Turbofan) അല്ലെങ്കിൽ ടർബോജെറ്റ് (Turbojet) എഞ്ചിനുകളാണ് ഉപയോഗിക്കുന്നത്. ചില ക്രൂയിസ് മിസൈലുകൾക്ക് മണിക്കൂറിൽ 885 കിലോമീറ്റർ വേഗതയിൽ പറക്കുമത്രേ. എന്നാൽ, സൂപ്പർസോണിക് (ശബ്ദത്തിന്റെ വേഗതയേക്കാൾ കൂടുതൽ) അല്ലെങ്കിൽ ഹൈപ്പർസോണിക് (ശബ്ദത്തിന്റെ വേഗതയുടെ അഞ്ചിരട്ടിയിലധികം) വേഗതയിൽ പറക്കുന്ന ക്രൂയിസ് മിസൈലുകൾക്ക് റാംജെറ്റ് (Ramjet) അല്ലെങ്കിൽ സ്ക്രാംജെറ്റ് (Scramjet) എന്ന എഞ്ചിനുകൾ ആവശ്യമാണ്. വിക്ഷേപണ സമയത്ത് ഒരു സോളിഡ് റോക്കറ്റ് ബൂസ്റ്റർ ഉപയോഗിച്ച് ഇവയ്ക്ക് പ്രാഥമിക ആക്സിലറേഷൻ നൽകാം, പിന്നീട് ഇത് വേർപെട്ടുപോകുന്നു.

Guidance System:

ക്രൂയിസ് മിസൈലുകൾക്ക് ലക്ഷ്യസ്ഥാനത്ത് കൃത്യതയോടെ എത്താൻ ഒന്നിലധികം ഗൈഡൻസ് രീതികൾ ഉപയോഗിക്കുന്നു. അതായത് ഒരുകൂട്ടം സാങ്കേതികവിദ്യകളുടെ സംയോജനമാണ് ക്രൂയിസ് മിസൈലുകളെ ചലിക്കുന്ന ലക്ഷ്യങ്ങളെയും സങ്കീർണ്ണമായ ഭൂപ്രകൃതികളെയും മറികടക്കാൻ പ്രാപ്തനാക്കുന്നത് എന്നത് ചുരുക്കം

Inertial Guidance: വിക്ഷേപണത്തിന് മുമ്പ് പ്രോഗ്രാം ചെയ്ത പാതയിലൂടെ മിസൈലിനെ നയിക്കാൻ മോഷൻ സെൻസറുകളും ഗൈറോസ്കോപ്പുകളും ഉപയോഗിക്കുന്നു.

Terrain Contour Matching (TERCOM): ഈ സാങ്കേതികവിദ്യ മിസൈൽ സഞ്ചരിക്കുന്ന സ്ഥലത്തെ ഭൂപ്രകൃതിയുടെ രൂപരേഖ മുൻകൂട്ടി നൽകിയ വിവരങ്ങളുമായി ഒത്തുനോക്കി പാത ഉറപ്പാക്കുന്നു. ഇതാണ് മിസൈലിനെ മലകളും, കുന്നുകളുമൊക്കെ മറികടന്നു പറക്കാൻ സഹായിക്കുന്നത്.

Global Positioning System (GPS): ഇത് നമുക്കെല്ലാം പരിചിതമായ GPS തന്നെ! മിസൈലിലെ GPS റിസീവറുകൾ ഉപഗ്രഹങ്ങളിൽ നിന്ന് സിഗ്നലുകൾ സ്വീകരിച്ച് മിസൈലിന്റെ കൃത്യമായ സ്ഥാനം തത്സമയം കണ്ടെത്തുന്നു.

Digital Scene Matching Area Correlator (DSMAC): അതായത് മിസൈലിന്റെ മുൻപിലുള്ള ഒരു ക്യാമറ ഉപയോഗിച്ച് ലക്ഷ്യത്തെ കണ്ടെത്തി സംഭരിച്ച ചിത്രവുമായി താരതമ്യം ചെയ്യുന്നു. ഈ ഒരു ടെക്നോളോജിയാണ് ചലിക്കുന്ന ലക്ഷ്യങ്ങളെ കണ്ടത്തി ആക്രമിക്കാൻ മിസൈലിന്റെ സഹായിക്കുന്നത്.

ഉപയോഗം:

ക്രൂയിസ് മിസൈലുകൾ സാധാരണയായി കെട്ടിടങ്ങൾ, കപ്പലുകൾ, കമാൻഡ് സെന്ററുകൾ, എയർപോർട്ടുകൾ എന്നിങ്ങനെയുള്ള കൃത്യമായ ലക്ഷ്യങ്ങൾ ആക്രമിക്കാനാണ് കൂടുതലും ഉപയോഗിക്കുന്നത്. ഇന്ന് ആണവായുധങ്ങൾ വരെ വഹിക്കാൻ ശേഷിയുള്ള ചില ക്രൂയിസ് മിസൈലുകൾക്കുണ്ട് ലോകത്ത്. 

അങ്ങനെ ബാലിസ്റ്റിക് മിസൈലിൽനെ വെച്ച്നോക്കുമ്പോൾ ക്രൂയിസ് മിസൈലുകളുടെ ഈ ഉയർന്ന കൃത്യതയും പറക്കലിനിടെ ദിശ മാറ്റാനുള്ള കഴിവും അവയെ കൂടുതൽ തന്ത്രപരമായി വഴക്കമുള്ളതാക്കുന്നു. ചലിക്കുന്ന ലക്ഷ്യങ്ങൾ, അല്ലെങ്കിൽ അവസാന നിമിഷം ഏതെങ്കിലും തരത്തിൽ മാറ്റം വരുത്തേണ്ടി വരുന്ന സാഹചര്യങ്ങൾ എന്നിവയിൽ ക്രൂയിസ് മിസൈലുകൾക്ക് വലിയ മുൻതൂക്കം തന്നെ നൽകുന്നു എന്ന് ചുരുക്കം.

Conclusion:

ക്രൂയിസ് മിസൈലും ബാലിസ്റ്റിക് മിസൈലും തമ്മിലുള്ള വ്യത്യാസം വായിച്ചപ്പോൾ നിങ്ങളെല്ലാം കുറച്ച് സീരിയസായിപ്പോയെന്നു തോന്നുന്നു! എന്തേ ശെരിയല്ലേ? ബാലിസ്റ്റിക് മിസൈലെന്നും ക്രൂയിസ് മിസൈലുമൊക്കെ കേൾക്കുമ്പോൾ വലിയ കാര്യമാണെന്ന് തോന്നും, പക്ഷേ സത്യം പറഞ്ഞാൽ ഇവ രണ്ടും മിസൈലുകളുടെ ലോകത്തെ രണ്ട് വിഭിന്ന സ്വഭാവക്കാരാണ് എന്നതാണ് സത്യം. ഒരാൾ  "എനിക്ക് തിരക്കില്ല, വഴിയൊക്കെ നോക്കി, വളവും തിരിവുമൊക്കെ നോക്കി, ചിലപ്പോൾ ഒരു ചായ കുടിക്കാൻ വേണ്ടി ഒന്ന് നിർത്തിയിട്ടൊക്കെ പോകാം..." എന്ന് പറഞ്ഞു അവസാനം റഡാറുകളുടെയൊക്കെ കണ്ണുവെട്ടിച്ചു ഒളിച്ചും, പാത്തും "ഞാനിങ്ങെത്തി, നിങ്ങളാരും അറിഞ്ഞില്ലല്ലോ അല്ലേ?" എന്ന് പറഞ്ഞു ലക്ഷ്യത്തിൽ എത്താനാണ് ഇഷ്ട്ടമെങ്കിൽ. മറ്റൊരാൾക്ക് (ബാലിസ്റ്റിക്) വഴിയിൽ എന്തുണ്ടെന്ന് നോക്കാനോ ചുറ്റിക്കറങ്ങാനോ ഒന്നും നിൽക്കാതെ "കുറച്ചു തിരക്കുണ്ടേ, ഞാൻ പോവുകയാണേ, എന്റെ ലക്ഷ്യം ഞാൻ തീരുമാനിച്ചു, നേരെ പോയി തകർക്കും!" എന്ന തരക്കാരനാണ്. ചുരുക്കത്തിൽ ഒരാൾ റൂട്ട് മാപ്പൊക്കെ നോക്കി സാവധാനം പോകുന്ന മാന്യനായ ഡ്രൈവറും, മറ്റേയാൾ വണ്ടി കിട്ടിയാൽ ഉടൻ റോക്കറ്റ് വിട്ടപോലെ പോകുന്ന ധൃതിക്കാരനും ആണെന്ന് പറയാം. രണ്ടാളും ഒടുവിൽ ഒരു പൊട്ടിത്തെറിയിൽ കലാശിക്കും എന്നത് മാത്രമാണ് ഏക സമാനത! 

ഏതായാലും ഈ മിസൈലുകൾ ആരുടെയും തലയ്ക്ക് മുകളിലൂടെ പറന്നു പോകാതിരിക്കാൻ നമുക്ക് പ്രാർത്ഥിക്കാം. യുദ്ധക്കളങ്ങളിലെ വില്ലന്മാരാണ് ഇവർ, അല്ലാതെ നമ്മുടെ ലിവിങ്‌റൂമിൽ സീരിയൽ കാണാൻ വരുന്നവരല്ലല്ലോ! അതുകൊണ്ട്, മിസൈലുകളുടെ ഭാരം തലയിൽ നിന്ന് ഇറക്കിവെച്ച്, തത്കാലം ഒരു ചായയൊക്കെ കുടിച്ചിരിക്കാം. അതാണ് നമുക്ക് നല്ലത്.